【港視開台慶】維基：市民主宰港視生死

[youtube]C0GoDErt-bc[/youtube]

【再起風雲】
【本報訊】今日開始，全港觀眾多了一個選擇，叫香港電視（HKTV），主席王維基經過五年努力，仍然要「無牌」播劇，開台前既緊張又開心，他盼「一男子」不再阻擾，面對前路，自嘲儍儍哋的王維基：「香港電視係香港人嘅事，如果香港人唔緊張，不如唔好做。」他將港視的命運交到市民手中，決心打造一個有民意支持的電視台。
記者：石永樂

為了今日開台，王維基近日做了不少訪問，「前一晚仲好攰，朝早起身就好開心，因為係最後24小時」。他昨日接受訪問時承認過去一直都很緊張，更以母親懷胎作比喻，「我媽咪陀BB都係9個月，我哋陀呢個BB陀咗59個月，但仍然好享受一班人去做一啲嘢，可能我仲係儍儍哋」。王維基自2009年12月入紙申請免費電視牌照至今近五年，結果因為「一男子」的決定，令到港視今天要無牌播劇。


「畀番觀眾去做選擇」
早前港視的開台劇選舉只得20萬人投票，有分析指港視對開台的宣傳不足，王維基解釋要刻意低調，原因是刻下香港的文化已經不同往日，「香港電視係香港人嘅事，如果香港人唔緊張，不如唔好做，成件事冇以好壓迫嘅勢頭去做……覺得比較適合𠵱家成個環境，若硬要個小朋友做乜做乜，個小朋友都唔想」。王維基昨接受電台訪問時亦指，現時年輕人正在單純地追求公義，但政府以成年人眼光，認為他們在乎回報和向上游機會，王維基認為完全不是實情，認為政府完全脫節。
王維基多次強調由觀眾做主導，「唔係口號，我哋盡量想將所有嘢畀香港人去決定，好似開台劇，真係比觀眾揀，我成日講，呢度係畀番觀眾去做選擇」。他承認近日香港時局發展，進一步證明香港人，尤其港視的目標觀眾，已不再聽「家長式」教導，「𠵱家成個文化，年輕人都係聽平輩講嘢，唔係聽Authoritative（權威性）講嘢，所以我哋完全降低咗電視台嘅身價，決心打造一個有民意嘅電視台」。
近日佔中被清場或影響港視收視，王維基並不在意，「香港電視成立得一個目的，希望帶畀香港人希望同歡樂……無論個（佔中）運動或香港未來嘅路平坦又好，崎嶇又好，香港電視嘅責任都係將希望同歡樂帶畀香港市民，香港經歷好多開心同不開心，作為一個媒體，要去撫平創傷」。

[img]http://static.apple.nextmedia.com/images/apple-photos/apple/20141119/large/1416328097_76e7.jpg[/img]
■港視今日開台，王維基坦言心情既緊張又開心。


憂黑客攻擊防不勝防
王維基仍就未獲發免費電視牌照進行司法覆核，但問他「萬一」獲發免費牌，會否放棄現時的網台形式，「做節目係做廚房，我煮啲食物出嚟，𠵱家我做緊外賣，我有舖頭我做埋堂食……已經同觀眾、合作夥伴建立咗良好關係，日後即使我多個播放平台，現有嘅嘢都會繼續」。至於是否對獲牌絕望，「𠵱家好多嘢都唔係用常理去睇，根本冇得估」。這是王維基的經驗之談。
相信命運的王維基於開台前，特別想向「一男子」說：「路始終要行，每一個人做嘢都有佢嘅目的，我哋亦係向我哋認為啱嘅事、為香港好嘅事，我哋都會繼續做，希望唔好再阻擾我哋啦。」他稱擔心再受打壓，更有準備可能做網上電視也不行，其中黑客攻擊更是防不勝防。王維基以自身經歷去勉勵港人，指「路係人行出來，一條不通可以行第二條」，認為香港人「轉數快」，只要堅持不放棄，「一定可以繼續做」。
王維基還多謝員工的無私奉獻，對於一班前員工，王維基沉思了10秒，「好抱歉，唔能夠負擔起咁大嘅團隊……裁減咗好多員工，希望未來營運重上正常軌道時，明年繼續製作更多電視節目，希望大家會唔嬲我，會再返嚟幫手」。

[img]http://static.apple.nextmedia.com/images/apple-photos/apple/20141119/large/a0401a.gif[/img]

[img]http://static.apple.nextmedia.com/images/apple-photos/video/20141119/org/1416339835_ee4c.jpg[/img]

來源:[url]http://hk.apple.nextmedia.com/news/art/20141119/18940301[/url]