老翻 blu-ray搞笑三級制

呢排網上討論區勁講大陸啲 blu-ray老翻越嚟越猖獗，話𠵱家有「三級」老翻blu-ray影碟：一級最無良，純粹 DVD充 blu-ray；二級係將原裝 blu-ray影碟嘅高清訊號，壓縮落 DVD碟，屬偽blu-ray；第三級係將正版 blu-ray影碟，直接燒落 BD-R白碟度。網友仲比較咗三級老翻碟同正版嘅影音畫質分別，結論當然係正版贏晒啦！
小藍早幾日都去深圳巡一巡，發現唔少店舖賣老翻影碟，仲明目張膽打開門做生意，店內放滿啲blu-ray影碟，包裝仲靚過啲正版，有埋藍光播放機畀客即場驗貨。但小藍發現，啲老翻 blu-ray分兩款價錢，一款賣 35蚊人仔，一款賣100蚊人仔。小藍問店員點解價錢分別咁大。佢話平價嗰款播唔到高清音效，貴價版就有齊晒所有高清音效。
音效好唔掂店員即播同一齣片嘅平價版及貴價版，前者畫面顯示係 AVCHD高清格式嘅 DVD碟，冇得揀音效；後者讀到係藍光 BD-R，有音效揀。店員話，要求唔高嘅話平價版都好靚嘞。小藍買咗一齣《克勤演奏廳》貴版返港測試，畫質唔差，但音效好唔掂，左右聲道唔平衡。
亞洲高清協會會長李栢權解釋話，正版 blu-ray碟容量有成 50GB，老翻得 25GB，老翻碟將正版內容 cut咗同再壓縮，質素冇保證，「想睇好嘢，梗係買正版啦！」
小藍啱啱收到風，話旺角商場都有二級偽 blu-ray，一隻賣 50蚊。都係嗰句啦，追求高清享受，唔好做儍仔買老翻。

http://hk.apple.nextmedia.com/template/apple/art_main.php?iss_id=20090523&sec_id=4104&subsec_id=11869&art_id=12791872&cat_id=11085919